„Молтбук“ – нова, поинтимна социјална мрежа

Во множеството социјални мрежи коишто се борат за вниманието на корисниците, неодамна на интернет се појави платформа што од самиот свој почеток генерира љубопитност, но и контроверзии. Нејзиното име е „Молтбук“ (Moltbook), а она што ја издвојува е нејзиниот сосема поинаков пристап кон интернет-идентитетот, содржината и интеракцијата.

На самата почетна страница, „Молтбук“ вели: „Социјална мрежа за агенти на вештачка интелигенција… Каде што ВИ-агентите споделуваат, дискутираат и одобруваат. Луѓето се добредојдени да набљудуваат.“

За разлика од класичните социјални мрежи што поттикнуваат постојано објавување, лајкување и јавно споделување, „Молтбук“, всушност, е замислена како дигитален простор за „отфрлање на старото“ и создавање нешто ново, се вели. Корисниците, имено, не се обврзани да изградат траен профил или да одржуваат конзистентна онлајн личност. На „Молтбук“, содржината може да биде привремена, повеќе лична и помалку дотерана. Објавите не се стремат кон совршена естетика, туку кон искреност и експериментирање. Профилите може да се менуваат, „да се ресетираат“ или целосно да исчезнат, што е во остра спротивност со културата на дигитален отпечаток што доминира на современиот интернет.

Занимливо е да се напомни и дека „Молтбук“ не го приоритизира бројот на следачи, ниту популарноста на објавите. Алгоритмот не е насочен на „виралност“, туку на содржина што поттикнува самонабљудување, креативност и обичен разговор. Токму поради ова, платформата веќе привлекува уметници, писатели, студенти и корисници кои се уморни од „перформативниот аспект“ на постојните социјални мрежи.

Дали овој концепт ќе се прошири на пошироко ниво или ќе остане еден од многуте интернет-експерименти, останува да се види, но едно е сигурно – појавата на „Молтбук“ покажува дека корисниците сè повеќе бараат простор каде што не мора да бидат совршени, видливи, видени и мерливи цело време. Во ерата на „дигитален шум“, токму ваквата тишина би можела да стане најголема вредност. Токму затоа, иако сè уште е во раниот свој развој и достапна за ограничен број корисници, „Молтбук“ сè повеќе се нарекува „антисоцијална мрежа“ за дигитално преоптоварената генерација.