„Укринформ“: Против Јулија Тимошенко поднесено обвинение во антикорупциска истрага за нелегални активности

Специјализираното обвинителство за борба против корупцијата (САП) и Националното биро за борба против корупцијата на Украина (НАБУ) ја известија лидерката на една од фракциите во Врховната рада за сомневања во врска со обезбедувањето нелегални бенефиции на пратениците, објави „Укринформ“ повикувајќи се на соопштение на САП на социјалната мрежа „Телеграм“.

„Лидерката на парламентарната фракција беше известена за сомневањата“, се наведува во соопштението на САП.

Портпаролката на украинското Специјално обвинителство за борба против корупцијата, Олга Постољук, потврди дека е поднесено обвинение против лидерката на партијата Татковина, Јулија Тимошенко.

Таа е обвинета за поткуп на службено лице, односно на други членови на Врховната рада на Украина, за што ѝ се заканува казна затвор од пет до 10 години.

Украинското Национално биро за борба против корупцијата (НАБУ) објави аудиоснимка од разговорот меѓу Тимошенко и пратеник во парламентот, во кој таа зборува за плаќање за парламентарни гласови. Во видеото Тимошенко зборува речиси шепотејќи. Таа му кажува на пратеникот како правилно да гласа. 

Агенциите за спроведување на законот забележаа дека откога НАБУ и САП открија случаи во декември кога пратениците добивале нелегални бенефиции во замена за одлуки за нацрт-закони во парламентот, осомничената влегла во преговори со одредени пратеници за воспоставување систематски механизам за обезбедување нелегални бенефиции во замена за лојално однесување за време на гласањето.

„Ова не е еднократен случај, туку редовен механизам на соработка, што е поврзан со авансни плаќања и бил планиран подолг период. Пратениците требало да добијат упатства за тоа како да гласаат, а во некои случаи дали да гласаат воздржано или да не учествуваат во гласањето“, забележа САП.

Тимошенко денеска потврди дека канцелариите на нејзината партија Татковина (Баткившчина) биле претресени, но ги негира обвиненијата.