Јапонската премиерка Такаичи планира предвремени избори на 8 февруари

Јапонската премиерка Санае Такаичи планира следната недела да го распушти парламентот и да распише предвремени општи избори, изјави денеска генералниот секретар на нејзината владејачка Либерално-демократска партија (ЛДП).

Премиерката Такаичи размислува за одржување на изборите на 8 февруари, изјави информиран извор, како што објавија домашните медиуми.

– Мора да побараме нов мандат, изјави Шуничи Сузуки, генерален секретар на ЛДП, по денешната средба со премиерката,

Како прва жена премиер во Јапонија, Такаичи сака да го искористи порастот на јавната поддршка за нејзината влада откако ја презеде функцијата во октомври за да го зајакне своето мнозинство во парламентот.

Сузуки рече дека изборите ќе им овозможат на гласачите да имаат збор во новата коалиција на ЛДП со десничарската Јапонска партија за иновации (ЈИП), позната како Ишин, откако Такаичи минатата година ги прекина врските со долгогодишниот либерален партнер во владата, партијата Комеита.

– Една од причините за распуштањето на парламентот е тоа што претходните избори беа одржани под владата на ЛДП и Комеита, јавноста сè уште не го дала својот став за промената на нашиот коалициски партнер, рече тој, додавајќи дека премиерката ќе ги презентира своите изборни планови на прес-конференција во понеделник.

Гласањето, додава Сузуки, исто така, ќе даде можност да се процени јавното мислење за плановите за зголемување на владините трошоци за заживување на растот и зголемување на трошоците за одбрана како дел од ревидираната стратегија за национална безбедност.