АНЕМ во Србија пријави ботовски напади врз независни медиуми

Претседателот на Управниот одбор на Асоцијацијата на независни електронски медиуми во Србија (AНЕМ) и член на Постојаната работна група за безбедност на новинарите, Веран Матиќ, пријави во Обвинителството за високотехнолошки криминал „напади од ботови“ врз Инстаграм сметките на Zoomer, Radar, Nova.rs, Nova S и N1, соопшти денеска Асоцијацијата.

Според AНЕМ, инстаграм-сметките на овие медиуми добиле десетици илјади нови следбеници за многу краток временски период со користење лажни профили. Тие се сомневаат дека целта на тоа е компанијата „Мета“ да ги оцени како нелегални активности и да ги блокира или затвори сметките на овие медиуми.

Јасно е дека станува збор за координирани дигитални напади врз независни медиуми, кои потсетуваат на DOS (Denial of Service) или DDoS (Distributed Denial of Service) напади, што може да се поведат по член 299 од Кривичниот законик – „Компјутерска саботажа“ – истакнува АНЕМ.

Редакциите на нападнатите медиуми ја известиле „Мета“ за нападите.