Бериша до граѓаните: Каде и да видите министри, фрлајте по нив јајца или домати, зашто се главни виновници за поплавите

Повторувајќи го барањето до Владата да прогласи вонредна состојба по поплавите во земјата, лидерот на опозициската Демократска партија, Сали Бериша упати несекојдневен апел до граѓаните.

– Каде и да видите министри, фрлајте јајца или домати по нив, тие се главната причина за вашите несреќи, рече Бериша на тркалезната маса на дел од опозицијата и граѓанското општество.

Бериша образложи и зошто опозицијата бара техничка влада за подготовка на слободни и фер избори, бидејќи тие повеќе не постојат.

– Нашата мисија е соборување на оваа Влада и слободни избори. И второ, да не се попречува правдата, рече Бериша во обраќањето на средбата на која и покрај повикот не присуствуваа претставници на четири поголеми опозициски партии.

На обвинувањата дека Ввладата е главниот виновник за поплавите, премиерот Еди Рама рече дека со ваква ситуација не се соочува само Албанија, туку и поширокиот регион.

Порача дека „дождот не престанува со клевети или протести туку со застанување на страната на граѓаните“.

– Потребно е трпение. Реакциите ја хранат нервозата, во ваква ситуација не се бараат имагинарни виновници, туку им се помага на вистински луѓе. Не им требаат клевети и теории, туку поддршка и здружување на силите. Оваа ситуација не ја зафати само Албанија, туку од Италија до Грција, Црна Гора и Косово, па дури и Турција, му одговори Рама.

Во меѓувреме, локалните власти на Драч упатија апел до жителите да избегнуваат непотребни движења и да бидат максимално внимателни, по најавата дека се очекува Драч да се соочи со силни ветрови во наредните часови.