Анкета: Поголем број граѓани ја обвинуваат Владата отколку ЕУ за спориот европски пат на Србија

За спорото движење на Србија кон Европската Унија во изминатите години голем број граѓани сметаат дека одговорна е сегашната влада, покажува месечната анкета на јавното мислење спроведена од Центарот за современа политика, објави „Савремена политика“.

За 37,7 проценти од испитаниците сегашната Влада е најодговорна за бавниот процес на интеграција, додека 33,3 проценти сметаат дека ЕУ е најмногу одговорна.

Дополнително, 24,4 проценти од испитаниците одговориле со „не знам“, додека преостанатите 4,5 проценти одговориле – некој друг. Во категоријата „некој друг“, испитаниците најчесто наведуваат дека и Владата и ЕУ се подеднакво виновни, а потоа дека е виновна некоја трета земја, како што се Русија или САД.

Србија не направила чекор напред во процесот на европска интеграција повеќе од четири години. Последниот пат кога отвори нови поглавја, во рамките на групата 4, беше кон средината на декември 2021 година. 

Анкетата е спроведена преку телефон во периодот од 3 до 11 декември 2025 година, на репрезентативен примерок од 1.000 испитаници. Нарачател на истражувањето е Центарот за современа политика, издавач на порталот „Савремена политика“. 

Како дел од тоа истражување, беше поставено и прашање за тоа како граѓаните би гласале на референдум за членство во ЕУ.

Кога тие две прашања се вкрстуваат, резултатот е дека 61% од испитаниците кои одговориле дека би гласале „за“ членство во ЕУ на референдум, исто така веруваат дека сегашната влада е најодговорна за бавниот пат на Србија кон Унијата додека 21,7% од нив веруваат дека самата ЕУ е најодговорна.

Од друга страна, меѓу испитаниците кои рекле дека би гласале „против“ на референдум за членство, 52,9% рекле дека ЕУ е најодговорна за бавниот пат на Србија, додека 27,8% рекле дека сегашната влада е најодговорна.