НАЕОПМ ги презентираше резултатите од програмите „Еразмус +“ и „Европски солидарен корпус“ во 2025 година

Националната агенција за европски образовни програми и мобилност (НАЕОПМ) денеска ги презентираше резултатите од спроведувањето на програмите на Европската унија „Еразмус +“ и „Европски солидарен корпус“ во 2025 година.

-Податоците покажуваат 95% искористеност на расположливиот буџет и успешна имплементација на бројни проекти за вмрежување на корисници од Македонија со партнери од други европски земји. В.д. директорката на Националната агенција, Ана Михајлов информираше годинава со над 7 милиони евра финансирани се 148 проекти со кои, пак, опфатени се 2079 корисници, соопшти Мнистерството за образование и наука. 

Како што истакна Михајлов, најголем дел од проектите „се однесуваат на хоризонтални приоритети, нови методи на учење и работа, вештини и компетенции за дигитална писменост, инклузија и ментално здравје“.

-Проектите се реализираа во соработка со партнери од земјите од регионот, но и од Франција, Белгија, Австрија, Португалија, Полска, Финска, Германија и други, рече Михајлов.

Државниот секретар во Министерството за образование и наука, Елена Ивановска, се наведува во соопштението на МОН, изрази благодарност до сите кои се заложија да изработат проекти за поддршка и развој на образованието, обуката, младите и спортот.

-Финансирани се квалитетни и корисни проекти и јас ги повикувам досегашните корисници да ги задржат интересот и заложбата на исто ниво и следната повторно да аплицираат за поддршка преку овие програми, кои се исклучително значајна компонента на севкупната национална стратегија за интеграција на македонскиот образовен систем во европскиот образовен простор, рече Ивановска.

Информираше дека буџетот за следната година достапен преку овие две програми ќе биде најголем досега и ќе изнесува над 8,17 милиони евра, односно за 430 илјади евра повеќе од 2025.

-Очекувам од Националната агенција да ги интензивира активностите за запознавање и на што повеќе нови, потенцијални корисници низ државата – ученици, студенти, наставно-научни работници, истражувачи, образовни институции, компании, граѓански здруженија, волонтери, младински работници итн., а Министерството за образование и наука како национален авторитет за програмите ќе помогне во тоа. Важно е да има промотивни теренски кампањи во соработка со локалните самоуправи, да има отворени инфо денови, конференции, медиумски кампањи…, бидејќи и Европската Унија сосема разбирливо очекува висока транспарентност и голема инклузивност, рече Ивановска.

МОН соопшти дека на конференцијата позитивни практики од реализирани проекти презентираа Филозофскиот факултет во Скопје, средното медицинско училиште „Д-р Панче Караѓозов“ во Скопје, Карате федерацијата на Македонија, Сојузот за младинска работа, Здружението за развој на ромската заедница „Сумнал“ и други корисници на средства во рамки на програмите.