Трамп потпиша указ за формирање работни групи за гарантирање на безбедноста на синџирот на снабдување со храна во САД

Американскиот претседател Доналд Трамп потпиша извршна наредба за формирање работни групи за гарантирање на безбедноста на синџирот на снабдување со храна во САД, соопшти синоќа Белата куќа.

Работните групи ќе бидат дел од напорите на Министерството за правда и Федералната трговска комисија на САД (ФТЦ) за спротивставување на нетранспарентното одредување цени и антиконкурентско однесување.

– Мојата администрација ќе преземе мерки за да утврди дали антиконкурентското однесување, особено од страна на странски компании, ги зголемува трошоците за живот на Американците, и ќе се справи со какви било поврзани закани за националната безбедност поврзани со синџирите на снабдување со храна, посочува Трамп во наредбата.

Според извршната наредба, министерот за правда и главен обвинител на САД и претседателот на трговската комисија ќе можат да преземат мерки за спроведување на законот и да предложат нови регулаторни пристапи, доколку за време на истрагата утврдат антиконкурентско однесување.