Почнува Самитот ЕУ и Латинска Америка во Колумбија

Лидерите од Европската Унија и Заедницата на држави од Латинска Америка и Карибите (ЦЕЛАК) се собираат денеска во Колумбија на нивниот четврти самит, со цел зајакнување на соработката за енергетиката, климатските промени и меѓународната безбедност, пренесе ДПА.

Меѓу оние кои ќе присуствуваат на дводневните разговори во крајбрежниот град Санта Марта се бразилскиот претседател Луиз Инасио Лула да Силва, шефицата за надворешна политика на ЕУ, Каја Калас, и шпанскиот премиер Педро Санчез.

Заедно, ЕУ и ЦЕЛАК претставуваат повеќе од една милијарда луѓе, што сочинува 14 отсто од светското население и 21 отсто од глобалниот економски аутпут.

Сепак, списокот на гости на состанокот е забележливо тенок. Претседателката на Европската комисија, Урсула фон дер Лајен, ќе го прескокне, како и лидерите на Германија, Франција, Мексико, Аргентина и Чиле.

Колумбискиот претседател Густаво Петро, домаќинот, планира да го покрене прашањето за смртоносните воени напади на САД врз наводни чамци за шверц на дрога во Карипското Море.

Зголеменото воено присуство на САД во регионот предизвика загриженост дека администрацијата на Доналд Трамп може да ги поставува темелите за операција насочена кон соборување на авторитарната влада на венецуелскиот претседател Николас Мадуро.

Вашингтон, исто така, воведе санкции кон Петро минатиот месец, обвинувајќи го за недостиг на одлучност во борбата против нарко- картелите.