Меља на првиот ден од мандатот: Почеток на едно ново поглавје за нашиот Дебар

Новиот градоначалник на Дебар, Фисник Меља, кој денеска официјално ја презеде функцијата од досегашниот Хекуран Дука, по првите часови минати во градоначалничкиот кабинет, преку објава на Фејсбук, порача дека ова е „почеток на едно ново поглавје за нашиот Дебар“.

-Денес официјално ја презедов функцијата градоначалник на Општина Дебар, по церемонијата на примопредавање на мандатот од поранешниот градоначалник,  Хекуран Дука. Ова е момент со голема одговорност и со посебни емоции за мене, бидејќи означува почеток на едно ново поглавје за нашиот Дебар, напиша тој.

Оваа доверба што ми ја дадовте, додава, не е само политички мандат, туку е морална обврска да се работи со чесност, транспарентност и посветеност во служба на секој граѓанин, во секое маало и во секое село на нашата општина.

-Дебар заслужува институции кои слушаат, кои дејствуваат и кои носат вистински развој. Заедно ќе изградиме општина на можности, соработка и благосостојба за сите. Бог да го благослови Дебар и неговите граѓани, посакува Меља.

На Меља и на 15-те членови на општинскиот Совет, претседателот на ОИК, Рилинд Хаса, денеска им ги  врачи уверенијата. На настанот присуствуваше и досегашниот градоначалник Хекуран Дука.