Втората Интердисциплинарна студентска конференција викендов во Охрид

Во организација на Универзитетското студентско собрание на Универзитетот „Кирил и Методиј“ од Скопје, викендов во Охрид ќе се одржува втората Интердисциплинарна студентска конференција.

Според најавената агенда, на собирот ќе се одржат 14 едукативни работилници, две панел-дискусии и една тематска забава. Работилниците ќе обработуваат теми од различни области — економија, технологија, здравје, општество и личен развој, информираат од Универзитетското студентско собрание на УКИМ.

Во рамки на конференцијата ќе се одржат и две панел-дискусии на теми: природно или совршено — што избираме и бесконечен раст на конечна планета — дали сме жртви на сопствената алчност.

Настанот има за цел да поттикне критичко размислување, интердисциплинарен пристап и активно вклучување на студентите во теми што го обликуваат современото општество, при што конференцијата претставува платформа за размена на идеи, искуства и визии за иднината, додаваат организаторите.