Александар Андов: ВМРО-ДПМНЕ и Коалицијата апсолутни победници и за градоначалник и за Совет на Општина Кочани

Нашите сограѓани вчера ја изразија својата волја за тоа каква општина сакаат да имаат во следните четири години. Според нив, ВМРО-ДПМНЕ и Коалицијата се апсолутни победници и за Совет на Општина Кочани и за градоначалник, рече денеска на прес- конференција носителот на советничката листа на ВМРО-ДПМНЕ Александар Андов. ВМРО – ДПМНЕ со коалицијата освои осум советнички мандати од 19 -те, а кандидатот за градоначалник Владко Грозданов е првопласиран со 2200 гласа повеќе од второпласираниот Венко Крстевски.

-Разликата во поддршката меѓу нас и нив е значајна. Околу 2.600 гласа повеќе во однос на второпласираните и околу 2.800 во однос на третопласираните. Преточено во мандати, ВМРО-ДПМНЕ и Коалицијата имаат повеќе советници од обединетите опозициски листи, од листата на Венко Крстевски и  носителката Благица Сабовлјевиќ, и СДСМ и Левица. Еве да го додадеме и ортакот на Крстевски, Аки Акиов. И тогаш  би биле еднакви во советничките мандати со сите нив заедно, што претставува јасна и недвосмислена поддршка од граѓаните Општина Кочани, смета Андов.

За жал, додаде тој,  видовме славење, ветувања и музика, алудирајќи на  независниот кандидат за градоначалник Венко Крстевски, кој со свои приврзаници во ромското маало го прославуваше влезот во вториот круг со музика и свирачи.

– Ние како политичка партија не организиравме прослави, не излегувавме на улиците и не славевме со музика, затоа што сметаме дека треба да сочувствуваме со сите граѓани, нагласи Александар Андов, носителот на листата со совеници на ВМРО – ДПМНЕ и Колаицијата „За твоја Македонија“.

Тој им се заблагодари на кочанчани за подршката и ги повика и во вториот круг својот глас да го дадат за Владко Грозданов, кој заврши како победник во првиот круг во битката за градоначалничката позиција.