Ново претпродолжение на ТВ-серијата „Игра на престоли“, објавен првиот трејлер

Обожавателите на светот на Вестерос добија нов подарок од продфукцијата на „Ејч-би-о“ (HBO). Имено, на американскиот „Комик кон“ во Њујорк објавен е првиот официјален кус трејлер за серијата „Витез на седумте кралства“ (A Knight of the Seven Kingdoms), ново претпродолжение на култната „Игра на престоли“.

Серијата се заснова на популарните романи на Џорџ Р. Р. Мартин – „Приказни за Данк и Ег“ (Tales of Dunk and Egg). Заплетот се одвива 100 години пред настаните од „Игра на тронови“ и следи едно необично дуо – Сер Данкан Високиот (Питер Клафи) и неговиот млад штитоносец Ег (Декстер Сол Ансел), момче чиј таен идентитет засекогаш ќе ја обликува судбината на Седумте кралства, според описот.

Самиот автор ги сподели своите чувства и возбудата претходно оваа година.

– Ја видов првата сезона на „Данк и Ег“, и таа е одлична. Сега работат на втората сезона. Тие се два лика кои се навистина посебни и необични за мене. Тие не се она што повеќето луѓе би го очекувале во фантастична приказна, изјави Џорџ Р. Р. Мартин.

Мартин, исто така, забележа дека серијата е „малку е помека и похумористична“, и оти се надева дека публиката е отворена за таков вид промена. „Витез на седумте кралства“ ќе се прикажува од јануари 2026 година.