Маж уапсен во Велика Британија поради хакерски напад врз европските аеродроми

Денес, германската новинска агенција ДПА објави дека еден маж е приведен поради наводен сајбер напад кој предизвика пречки во работата на аеродромот Хитроу и други европски аеродроми.

Британската Национална агенција за борба против криминалот (НЦА) денеска објави дека лице под истрага, на возраст од 40-тина години, е уапсено вчера во Западен Сасекс под сомневање за компјутерски криминал и е пуштено на слобода со гаранција.

Заменик-директорот Пол Фостер, кој е на чело на Националната единица за сајбер криминал при НЦА, изјави: „Иако ова приведување е позитивен чекор, истрагата за овој инцидент е во почетна фаза и сеуште трае“.

Тој исто така додаде: „Сајбер криминалот е континуирана глобална закана која продолжува да создава значајни нарушувања во Обединетото Кралство.“

Овој сајбер напад, исто така, ја погоди и американската компанија Колинс Аероспејс, снабдувач на услуги за аеродроми, овој месец, нарушувајќи ги системите за регистрација и чекирање на аеродромите Хитроу во Лондон, како и оние во Брисел, Берлин и Даблин.