Десетици илјади демонстранти во Бразил протестираа против предложениот закон за амнестија за Болсонаро

 Десетици илјади демонстранти излегоа на улиците на неколку бразилски градови за да се спротивстават на предложениот закон за амнестија кој би можел да му користи на поранешниот претседател Жаир Болсонаро.

На 11 септември, 70-годишниот Болсонаро беше осуден на повеќе од 27 години затвор за обид за пуч по неговиот пораз на изборите во 2022 година.

Според проценките на локалните медиуми, повеќе од 40.000 луѓе учествувале на протестите во големите градови Сао Паоло и Рио де Женеиро. На демонстрациите на плажата Копакабана во Рио, се придружија и познатите бразилски музичари Каетано Велосо, Гилберто Гил и Чико Буарке, пренесе ДПА.

Десничарскиот поранешен претседател моментално е во домашен притвор. Неговиот правен тим најави дека ќе поднесе жалба на пресудата. Во исто време, поддржувачите на Болсонаро во Парламентот се обидуваат да го забрзаат усвојувањето на законот за амнестија кој би можел да му користи нему и на неговите сојузници.

На 8 јануари 2023 година, поддржувачите на Болсонаро упаднаа во Конгресот, Врховниот сојузен суд и претседателската палата во Бразилија. Иако поранешниот претседател тој ден беше во САД, Врховниот сојузен суд на Бразил го сметаше за индиректно одговорен за настаните. Неговите адвокати ги негираа обвиненијата за време на целиот процес.

Бразил останува длабоко поларизиран помеѓу поддржувачите на левичарскиот претседател Луис Инасио Лула да Силва и оние на неговиот десничарски претходник, Болсонаро. Некои ги сметаат кривичните постапки за политички мотивирани, додека други ги гледаат како демонстрација на институционална сила.

Експертите предупредија дека неделите по пресудата на Болсонаро би можеле да бидат обележани со протести.