МЖСПП: Објектот зафатен со пожар во Трубарево поседува валидна дозвола за управување со отпад

Министерството за животна средина и просторно планирање соопшти дека објектот за рециклирање на батерии и електронски отпад во кој вчера избувна пожар поседува валидна дозвола за управување со отпад, издадена од ова Министерство.

– Надлежните служби веднаш интервенираа и работат на целосно локализирање и гасење на пожарот. За да се обезбедат точни и транспарентни информации во врска со евентуалното влијание врз животната средина и здравјето на граѓаните, Министерството ангажираше акредитирани лаборатории за мерење на квалитетот на амбиенталниот воздух во погодената зона, наведе МЖСПП вечерва во соопштение. 

Најави дека резултатите од овие мерења ќе бидат јавно објавени веднаш по нивната обработка и оти првите резултати веќе се очекуваат вечерва.

Министерството соопшти дека ќе продолжи редовно и навремено да ја информира јавноста за сите понатамошни активности и наоди поврзани со настанот.

Во очекување на резултатите од мерењата, препорачува граѓаните во погодената област да ги преземат следниве мерки за заштита:

1. Останете дома – Избегнувајте престој на отворено, особено во близина на локацијата на пожарот.

2. Затворете ги прозорците и вратите, за да се намали можноста за внесување на загаден воздух во просториите.

3. Исклучете надворешна вентилација, Избегнувајте користење на клима уреди и системи без филтри кои вовлекуваат воздух однадвор.

4. Заштитете ги ранливите групи – Децата, постарите лица и лицата со хронични заболувања нека останат во затворен простор.

5. Користете заштитни маски – Ако е неопходно излегување, носете маски од тип FFP2 или FFP3.

6. Бидете внимателни со храна и вода – Темелно измијте овошје и зеленчук од околните градини. Користете само вода од сигурни извори.

7. Следете ги официјалните информации, Редовно информирајте се преку каналите на Министерството.

– Министерството апелира на смиреност и рационално однесување и уверува дека сите надлежни институции се мобилизирани за следење и управување со состојбата, се вели во соопштението.