Јавен отчет на битолскиот градоначалник Тони Коњановски

Градоначалникот на Битола Тони Коњановски на посебна публикација ги претстави постигнатите резултати од работењето на локалната самоуправа во периодот 2021 – 2025 година. Во јавниот отчет на градоначалникот Коњановски, граѓаните можат да се информираат за капиталните и други проекти, насочени кон развој и модернизација на општината во интерес на сите нејзини жители, соопштија од тамошната локална самоуправа.

Во изминатите четири години од мандатот на Коњановски извршено е осветлување на архитектонскиот бисер Широк Сокак, изградени се влезот во Битола од Охрид и од Скопје, велосипедски патеки и нов парк во Нова Битола.

-Во овој период поставени се фотоволтаици на 10 училишта, изградба на детска градинка во АРМ и нова противпожарна зграда, на стадионот „Петар Милошевски“ комплетирана е северната трибина, и почна реализација на проект за јужната трибина, а се подготвува и нов  ГУП за Општина Битола. Во публикацијата може да се прочита за реконструкција, осветлување и хортикултурно уредување на паркинг просторот кај спортската сала „Боро Чурлевски“, за пешачката патека „Тумбе кафе – Смолево“, како и за авантуристичкиот парк на Пелистер, соопштија од Општина Битола.

Во мандатниот период на Коњановски изградени се и реконструирани улици и патишта во должина над 50 километри, започнати со реализација се 14 од вкупно 16 проекти, поддржани од Владата на Република Македонија, а општината од  Владата доби 707 милиони за други 65 нови проекти.

Отчетот за периодот 2021–2025 година ја отсликува доследноста во работењето на локалната самоуправа, реализираните проекти и заложбата за континуиран развој на општината, информираа од секторот за односи со јавност на битолскиот градоначалник.