Видео: Нов бизарен инцидент на US Open – навивач се обиде да ја отвори торбата на Синер

Италијанскиот тенисер Јаник Синер доживеа необичен и помалку бизарен инцидент со еден навивач на US Open. По убедливата победа во четвртфиналето против Александар Бублик, еден од гледачите се обиде да ѕирне во неговата спортска торба.

Синер го декласираше Бублик со 6:1, 6:1, 6:1 на стадионот „Артур Еш“ во меч кој траеше само 81 минута. Додека првиот светски рекет делеше пешкири и се фотографираше со публиката, еден навивач – очигледно незадоволен од краткиот меч – се наведна преку оградата и се обиде да ја откопча торбата на Синер зад неговиот грб.

Благодарение на брзата реакција на обезбедувањето, кое ја одби неговата рака, обидот беше спречен, по што Синер се сврте и го напушти теренот.

Не е прв инцидент на турнирот

Овој случај доаѓа само неколку дена по уште еден инцидент што ја згрозе јавноста. Камерите снимија момент кога маж му ја грабна потпишаната капа на полскиот тенисер Камил Мајхржак од рацете на мало дете. Подоцна беше идентификуван како Пјотр Шчжерек, извршен директор на полска компанија, а снимката стана вирална.

Синер: „Беше добра изведба“

Синер по мечот не го коментираше инцидентот, а својот настап на US Open го продолжува во среда, кога ќе игра против сонародникот Лоренцо Музети.

Поразениот Бублик изјави дека играта на Синер изгледала како да е „генерирана од вештачка интелигенција“, но Италијанецот застана во негова одбрана, истакнувајќи дека секогаш се труди да прикаже најдобар тенис.

„На крајот на денот, се обидуваме спортот да биде што е можно поинтересен,“ рече Синер. „Денес играв одлично и успеав рано да го скршам ритамот на противникот, што ми даде самодоверба да сервирам и да играм подобро од основната линија.“

„Мечот беше брз, но од моја перспектива тоа е добро. Очигледно, луѓето доаѓаат да гледаат големи битки, а тоа не е секогаш случај. Но за мене, ова беше добра изведба,“ заклучи Синер.