Двајца 15 годишни фудбалери на „Брегалница“ повредени по инцидентот за време на натпреварот со „Шкупи“ во Штип

Родител на фудбалер од фудбалскиот клуб „Шкупи“ ќе заработи кривична пријава, заради физички напад на малолетнци фудбалери од Фудбалскиот клуб „Брегалница“-Штип. Во моментот на инцидентот се играл фудбалски натпревар меѓу фудбалските клубови „Шкупи“ и „Брегалница“ генерација на фудбалери (2009-2010) година. Повредените се двајца фудбалери од ФК „Брегалница“ и се примени во штипската Клиничка болница, каде што  првично им се констатирани телесни повреди, потврдуваат за МИА надлежните од штипската Клиничка болница.

Александар Иванов генерален секретар на ФК „Брегалница“-Штип во изјава за МИА вели дека инцидентот се случил на 87 или 88 минута, токму при крај на натпреварот, кога на фудбалер со број 9 од ФК „Скупи“ му бил доделен црвен картон од страна на судијата. 

-По што тој нападна еден од нашите играчи и му удари бокс, а потоа влегоа неколку родители на децата од „Шкупи“ и почнаа да ги напаѓаат нашите деца од ФК „Брегалница“. Едно од нападните деца е претпоставувам со скршен нос, му тече крв од носот. Друг играч има повреда на ногата и двете деца се во болница, вели Иванов. 

Тој појаснува дека тројца родители на фудбалери од „Шкупи“ ги нападнале фудбалерите на „Брегалница“, по што влегле и нивните родители. Потврдува дека еден од тројцата родители е приведен во Полициска станица-Штип, бидејќи замавнувал со боксови и ударал клоци на 15 годишните фудбалери. Иванов вели дека за првпат се случува на терен родител да нападне малолетник фудбалер.

Раководството на ФК „Брегалница“-Штип го осудува овој инцидент што се случи на денешниот натревар меѓу младите фудбалери на „Брегалница“ и „Шкупи“. Надлежните од МВР го потврдуваат инцидентот, што се случи на стадионот „Бело Брдо“ во Штип, а во текот на денот се очекуваат подетални информации.