Мицкоски до Филипче: Бројките и мерките се немилосрдно во полза на оваа Влада, имаме една од најниските стапки на инфлација

Мерката што ја направи Владата за намалување на ДДВ од 18 на 10 отсто за нафтените деривати, а сега и можноста Регулаторната комисија да ги намали акцизите и на дизелот и на безоловните горива, придонесе на месечно ниво да имаме една од најниските стапки на инфлација – порача денеска од говорницата на македонското Собрание претседателот на Владата, Христијан Мицкоски.

Одговарајќи на пратеникот и претседател на СДСМ, Венко Филипче, за тоа кои мерки ги има преземено Владата за менаџирање на кризата, тој одговори дека мерките што ги имала преземено владата на СДСМ и ДУИ донеле долгови и до ден-денеска тие се враќаат. 

– Вашите мерки од времето ги плаќаме до денеска, еве солидарниот данок – сега ја вративме првата рата од 20 милиони евра, сега и втората рата од следните 20 милиони евра. Тие мерки ги видоа граѓаните и на неколку изборни циклуси по ред го даваат одговорот на мерките од времето на владата на СДСМ и ДУИ. 

Претседателот на Владата, Мицкоски, истакна дека кога опозицијата прави споредба за мерките и економијата, треба да направи споредба на реални параметри. 

– Владата во изминатите шест квартали генерира просечно раст на бруто-домашниот производ (БДП) од 3,5 проценти. Реален и номинален над 7 проценти. Владата на СДСМ и ДУИ, пак, во првите шест квартали имаше раст на БДП од 1,8 отсто, номиналниот под 6 проценти. Ако сакате да ги земете и 28-те квартали, како што функционираше таа Влада растот беше под 2,8 отсто. Значи два спрема еден е разликата. Инаку, за стапката на инфлација, токму онаа мерка која што ја направи Владата намалување на ДДВ од 18 на 10 отсто, а и сега можноста и Регулаторната комисија да ги намали акцизите и на дизел и на безоловните горива придонесе да имаме на месечно ниво една од најниските стапки на инфлација. Еве ќе ви ги прочитам, Бугарија е 0,9, ние сме 0,7, да речеме Германија е 1,2, Ирска е 1,7, Грција е 2, Шпанија е 1,5, Хрватска е 1,2 итн. Само четири држави во Европа имаат на месечно ниво пониска стапка на инфлација Словенија, Белгија, Естонија која што има секако висока и Словачка. Сите останати имаат повисока стапка на инфалција на месечно ниво-вели Мицкоски. 

Претседателот на Владата истакна дека единствената држава која учествува од буџетот во мерките е токму нашата и ниту една друга во Европа и како што рече сите останати прават импровизиција. 

-Ја спомнавте Хрватска и нафтата во Хрватска. Нафтата во Македонија е едно и пол евро по литар, а во Хрватска 1,81 евро/цент за литар. Нема параметар, нема статистика, со која што ќе можете да го споредите ова, со тоа што вие го правевте. Впрочем на избори граѓаните носат суд, за тоа што за граѓаните прави оваа Влада и што сте правеле вие како Влада. Кога правите споредба треба да сфатите дека ги потсетувате граѓаните на најлошите времиња во македонската историја на политичката сцена. Времиња полни со криминал, времиња полни со корупција, банди што хараат во Скопје. Времиња во кои што се запалуваат модуларни болници. Времиња во коишто Македонија плаќаше рекет во еден локал во југоисточна Македонија-вели Мицкоски. 

Премиерот Мицкоски од собраниската говорница рече дека и до ден денеска се враќаат долговите од Владата на СДСМ и ДУИ, а освен долговите за солидарниот данок, треба како што рече, да запишат еврообврзници од 900 милиони евра од времето на СДСМ и ДУИ, како и 700 милиони евра еврообврзница која треба да се врати, и останато е буџетски дефицит и камати. 

-Бројките и мерки се немилосрдно во полза на оваа Влада, споредно со вас, два спрема еден во најмала бројка, а политички е три спрема еден. Политички е минимум три спрема еден зависи од тоа кој и како ги прави анкетите – подвлече Мицкоски. 

На прашањето на пратеникот на Левица Димитар Апасиев, дали Мицкоски лично стои зад проектот за „вдомување“ на Дарко Костадиновски на некој од државните универзитети по завршувањето на неговиот мандат како претседател на Уставниот суд, премиерот кусо одговори, не и оти прашањето треба да го постави на друго место.