Перински : Во Чешиново – Облешево годинава ќе се реализираат девет проекти во вредност од 60 милиони денари

Во рамки на караванот „Каде што срцето е дома“, денеска министерот за локална самоуправа, Златко Перински оствари посета на Општина Чешиново – Облешево, при што се сретна со градоначалникот Јорданче Костадинов и со членовите на Советот и на општинската администрација.

На средбата станало збор за секојдневните предизвици со кои се соочуваат граѓаните и администрацијата, за динамиката на спроведување на инфраструктурните проекти во општината и за активностите кои ги спроведува Министерството во насока на јакнење на нејзините капацитет, информираат од локалната самоуправа.

За Општина Чешиново – Облешево во 2025 година, преку Програмата за рамномерен регионален развој и Програмата за намалување на диспаритетите, се обезбедени средства за реализација на три проекти во вредност од над 3 милиони денари.

-Дополнително, Општината преку Владата има обезбедено средства за девет проекти, преку двата јавни повика за капитална инфраструктура во вкупна вредност од над 60 милиони денари, сопшти министерот Перински по разговорот со градоначалникот Костадинов и со советниците.