Мацут: Националните совети на малцинствата се најдоброто место за нивни развој

На денешната седница на Советот за национални малцинства во Србија што се одржа во Белград, со која претседаваше премиерот Ѓуро Мацут, во присуство на министерот за човекови и малцински права и социјален дијалог, Демо Бериша, беше усвоена Предлог-програмата за распределба на средства од Буџетскиот фонд за национални малцинства во 2026 година, за што се обезбедени вкупно 30 милиони динари.

Според предлог-програмата за распределба на средствата, се очекува културата да биде приоритетна област за финансирање на програми и проекти за националните малцинства оваа година, според соопштението на Министерството за човекови и малцински права и социјален дијалог. Беше истакнато дека тоа ја потврдува решеноста на владата да продолжи да работи на подобрување и развој на културните практики на националните малцинства во Србија.

На седницата се дискутираше Извештајот за работата на Координацијата на националните совети на националните малцинства, како и Извештајот за спроведените и планираните активности на Националните совети на националните малцинства.

На седницата на Советот за национални малцинства, присуствуваше и претседателката на Македонскиот национален совет, Зорица Митровиќ. Македонскиот национален совет останува посветен на активното учество во институционалниот дијалог и унапредувањето на правата, идентитетот и културниот развој на македонската заедница во Република Србија, нагласија од тој македонски Совет.

Премиерот на Србија наведе дека во националните совети, активностите на сите национални малцинства се промовираат на најдобар начин и се обезбедуваат можности за образовни, едукативни и културни активности на членовите на националните малцинства што живеат во Србија.

Мацут изјави дека изборите за Советите на националните малцинства ќе се одржат оваа година.Според планот, треба да се одржат во крајот на оваа година.

Тој изрази надеж дека ќе продолжи добрата, плодна и многу конструктивна соработка со сите национални малцинства и му се заблагодари на министерот за човекови и малцински права и социјален дијалог, Демо Бериша, за вклучувањето во дијалогот со националните совети. 

Министерот за човекови и малцински права и социјален дијалог, Демо Бериша, изјави дека националните малцинства, и во претходниот период и денес, покажаа дека можат да придонесат за изградбата на Србија и додаде дека ресорното министерство ќе продолжи понатаму да ги зајакнува правата и положбата на националните малцинства преку континуиран дијалог и соработка со националните совети.