Директорот на СЗО: Нападите врз нуклеарните постројки во Иран и во Израел ја доведоа војната во опасна фаза

Директорот на Светската здравствена организација (СЗО), Тедрос Аданом Гебрејесус, денеска предупреди дека нападите врз нуклеарните постројки во Иран и Израел ја втурнале војната во „опасна фаза“.

„Војната на Блискиот Исток достигна опасна фаза, а се вели дека нападите го погодиле комплексот за збогатување на ураниум Натанз во Иран и израелскиот град Димона, каде што се наоѓа нуклеарен комплекс“, напиша тој во објава на X.

Тедрос додаде дека не се пријавени индикации за зголемени нивоа на зрачење надвор од тие локации, објави Гардијан.
„Нападите насочени кон нуклеарни локалитети претставуваат зголемена закана за јавното здравје и безбедноста на животната средина“, предупреди директорот на СЗО.
Тој итно ги повика сите страни да покажат максимална воена воздржаност и да избегнуваат какви било дејствија што би можеле да предизвикаат нуклеарни инциденти.

Неговите коментари дојдоа откако иранска ракета го погоди израелскиот град Димона, во близина на местото на нуклеарен објект. Иран ги нарече нападите одмазда за нападите врз сопствениот нуклеарен објект во Натанз.