Започнува регионалниот проект EQUALS за унапредување на бесплатната правна помош

Со обезбедени над 2,5 милиони евра од Австриската агенција за развој, започнува регионалниот проект EQUALS, чија цел е зајакнување на пристапот до бесплатна правна помош за околу 3.000 граѓани во Северна Македонија и Албанија. Проектот, кој го спроведува УНДП во партнерство со Министерството за правда, има за фокус унапредување на системот за правна поддршка согласно европските стандарди, со посебен акцент на жените, ранливите заедници и жртвите на родово базирано насилство.

Како што соопштуваат од УНДП, проектот, со вкупен буџет од 2.500.000 евра, ќе се спроведува во периодот до 2028 година на територија на Северна Македонија и Албанија.

Проектните активности ќе имаат за цел да обезбеди поквалитетен и поефикасен систем на бесплатна правна помош, со посебен фокус на жените и заедниците во неповолна положба.

ЕQUALS ќе придонесе за подобар пристап до правда за жртви на семејно и родово базирано насилство, жени и девојчиња во ранливи ситуации, етнички малцинства, вклучително Роми и Египќани. Интервенциите ќе бидат реализирани од Министерството за правда.

Во период од три години, проектот ќе обезбеди поддршка за најмалку 3.000 корисници во 8 региони во државата, ќе работи на зајакнување на капацитети кај 150 професионалци и ќе додели 15 грантови на граѓански организации кои обезбедуваат бесплатна правна помош.

Посебен фокус ќе има во општините Скопје, Куманово, Штип, Струмица, Тетово, Битола, Делчево и Свети Николе, каде што веќе функционираат овластени даватели на бесплатна правна помош.

Дополнително, проектот ќе иницира активности и во една општина каде што вакви услуги сè уште не се воспоставени.