Божиновска – Рама: Гасното поврзување на државата е клучен чекор кон енергетска стабилност и регионална интеграција

Тековните активности и следните чекори за развој на гасната инфраструктура во државата беа тема на разговор на денешната работна средба меѓу министерката за енергетика, рударство и минерални суровини, Сања Божиновска, и извршниот директор на НОМАГАС АД Скопје, Недим Рама.

Во фокусот на разговорите, како што информираат од Министерството за енергетика, рударство и минерални суровини, беше изградбата на интерконекторот со Грција како еден од најзначајните стратешки енергетски проекти во земјата. На средбата беше направен пресек на досегашната динамика на реализација, текот на градежните активности и координацијата меѓу институциите и изведувачите, со цел проектот да се реализира во согласност со предвидените рокови.

– Посебно внимание беше посветено и на подготовките за реализација на интерконекторот со Србија, при што беше разгледан напредокот во техничките и административните активности, како и тековната комуникација и координација со српската страна. Двете страни оценија дека регионалното гасно поврзување претставува значаен чекор кон диверзификација на изворите на снабдување и зголемување на енергетската сигурност – соопшти Министерството.

На состанокот се разговараше и за долгорочните планови за развој и проширување на националната гасоводна мрежа со цел овозможување поголема достапност на природниот гас за индустријата, општините и домаќинствата, како и поддршка на енергетската транзиција и намалување на загадувањето преку почисти енергетски решенија.

Министерката Божиновска ја истакна важноста од забрзана реализација на инфраструктурните проекти нагласувајќи дека развојот на гасната мрежа е стратешки приоритет, кој директно влијае врз економската стабилност, конкурентноста на стопанството и сигурноста во снабдувањето со енергија.

Соговорниците се согласија дека координираниот институционален пристап и засилената регионална соработка се клучни за успешно позиционирање на државата како стабилен енергетски јазол во регионот.