Документарецот „Приказната за Силјан” прикажан во 15-ина града во Македонија

Продукцијата „Кино Балкан” соопшти дека во изминатиот период дистрибуира македонски и филмови од регионот, меѓу нив и документарниот „Приказната за Силјан“ на режисерката Тамара Котевска, кој е прикажан во повеќе од 15 града во Македонија.

– Филмот соборува рекорди како по број на гледачи така и по број на места на кои е прикажан. Она што се издвојува од оваа дистрибуција е активниот пристап и откривањето нови региони и културни центри овозможувајќи филмот да допре до секој гледач, до секое ќоше од републиката притоа овозможувајќи оваа исклучителна приказна да ја доживее секој жител на земјата – информира „Кино Балкан“. 

Во иднина планира и организирани проекции за основни и средни училишта во државата активно воведувајќи го филмското дело како дел од образовниот систем по примерот на европските земји.

– Време е македонскиот филм да го добие вистинското место во киносалите во Македонија и да добие вистински третман. Време е македонскиот филм да ѝ  се врати на македонската публика – се наведува во соопштението.