Сибиха: Руските обвинувања за напад врз резиденцијата на Путин се лажни и ги подриваат мировните напори

Украинскиот министер за надворешни работи Андриј Сибиха денеска остро ги демантираше тврдењата на Москва за наводен украински напад врз резиденцијата на рускиот претседател Владимир Путин, оценувајќи дека ваквите манипулации директно го подриваат конструктивниот мировен процес.

Сибиха упати апел до меѓународната заедница да се воздржи од официјални реакции на овие тврдења, нагласувајќи дека Русија досега не презентирала ниту еден релевантен доказ.

„Помина речиси еден ден, а Русија сè уште нема претставено никаков веродостоен доказ за своите обвинувања за наводниот украински ‘напад врз резиденцијата на Путин’. Нема ни да претстават, бидејќи такво нешто не постои. Никогаш не бил извршен таков напад“, објави Сибиха на социјалната мрежа Икс.

Тој изрази разочарување и загриженост од официјалните соопштенија на Обединетите Арапски Емирати (ОАЕ), Индија и Пакистан, кои изразија загриженост за инцидентот во Москва.

„Уште повеќе изненадува тоа што сите три држави не издадоа никакви официјални соопштенија кога вистинска руска ракета погоди вистинска зграда на украинската влада на 7 септември 2025 година“, напиша Сибиха.

Шефот на украинската дипломатија потсети на „долгата историја на лажни тврдења“ на Русија, наведувајќи ги како пример уверувањата на Кремљ од почетокот на 2022 година дека нема да ја нападне Украина. Според него, зборовите на Москва никогаш не треба да се земаат здраво за готово, бидејќи тие често ги обвинуваат другите за она што самите планираат да го сторат.

„Ваквите реакции на неоснованите тврдења на Русија само ѝ одат во прилог на руската пропаганда и ја охрабруваат Москва на нови злосторства и лаги. Ги повикуваме сите држави да дејствуваат одговорно и да се воздржат од одговори на непроверени тврдења“, порача Сибиха.