САД запленија нафтен танкер во близина на Венецуела

Крајбрежната стража на САД за првпат заплени нафтен танкер откако претседателот Доналд Трамп најави блокада на санкционираните пратки нафта кон и од Венецуела, преземајќи контрола врз пловило во близина на венецуелскиот брег.

Крајбрежната стража вчера изврши „молскавична операција“ во координација со Министерството за одбрана „за заплена на моторниот танкер Centuries, кој е осомничен за пренесување нафта што е предмет на американски санкции“, соопшти американското Министерство за внатрешна безбедност во објава на X.

– Железната тупаница на здружените американски воени и федерални органи за спроведување на законот владее со брановите, додаде министерството.

Претходно, министерката за внатрешна безбедност Кристи Ноем извести за операцијата на X и објави видео за кое рече дека ја прикажува заплената.

– Соединетите Држави ќе продолжат да го прогонуваат недозволеното движење на санкционирана нафта што се користи за финансирање на нарко-тероризмот во регионот. Ќе ве најдеме и ќе ве запреме, рече Ноем.

Венецуела остро ја критикуваше операцијата, при што потпретседателката Делси Родригез изјави дека земјата „ја осудува и отфрла кражбата и киднапирањето на приватен венецуелски танкер, како и присилното исчезнување на неговиот екипаж, извршено од американски воен персонал во меѓународни води“.

Родригез ја опиша акцијата како чин на пиратство и кршење на меѓународното право, додавајќи дека Венецуела ќе поднесе жалба до Советот за безбедност на ОН.