Четири деца исчезнаа во руската Самарска област, покрената потрага

Руската полиција покрена потрага по десетгодишно момче и три девојчиња на возраст од 5, 10 и 11 години кои синоќа исчезнале во областа Самара, откако не се вратиле од прошетка.

Како што соопшти Главниот управен орган на Министерството за внатрешни работи за регионот, децата исчезнале на 20 декември 2025 година околу 20.30 часот по локално време, а нивната локација во моментов не е позната.

Полицијата упатила известување со описи на исчезнатите деца до припадниците на полицијата и другите безбедносни организации. Службеници на криминалистичката полиција прибираат искази и го испитуваат кругот на познаници на децата.

Полицијата презема сеопфатни пребарувања на теренот, вклучувајќи обиколка на дворови, улици, напуштени објекти и други места, јавија локалните медиуми.