Зеленски вели дека Русија ја нападнала Украина со повеќе од 450 дронови

Украинскиот претседател Володимир Зеленски денеска објави нови ноќни напади од страна на Русија врз многу делови од земјата, со повеќе од 450 дронови и 30 ракети.

-Главниот удар повторно го погоди нашето снабдување со енергија, југот и регионот Одеса, објави Зеленски на социјалните медиуми. Во тек се работи на враќање на снабдувањето со електрична енергија и вода во заедниците.

Според властите, магацин за жито во пристаништето Одеса, исто така, се запалил.

„Две лица се повредени во регионот Одеса“, рече Зеленски, додавајќи дека повеќе од десетина цивилни објекти се оштетени во земјата.

„Илјадници семејства се без струја по синоќешните напади во регионите Кировоград, Николаев, Одеса, Суми, Харков, Херсон и Чернигов“, рече тој.

Службениците соопштија дека уште пет лица се повредени во Николаев на Црното Море за време на нападите.

„Важно е сите сега да видат што прави Русија. Секој чекор што го преземаат е терор против нашиот народ, секој напад, бидејќи дефинитивно не станува збор за завршување на војната“, рече Зеленски, очигледно осврнувајќи се на цврстиот став на Москва кон мировните преговори што ги водат САД.

И покрај напорите на многу земји – што треба да продолжат во Берлин утре и в понеделник – јасен договор за завршување на војната сè уште не е на повидок.

Паралелно со преговорите, Русија врши огромен воен притисок со воздушни напади за да ја принуди Украина да ги прифати нејзините услови за прекин на огнот.

Русија сака да ја уништи Украина како држава, рече Зеленски. „Затоа ни е потребна поддршка во сè што помага да се заштитат животите и да се стави крај на оваа војна: зајакнување на нашата воздушна одбрана и нашите војници на фронтот“, рече тој.

На земјата ѝ треба оружје со долг дострел и посилен притисок врз Русија, нагласи Зеленски.