Писториус ги поврзува инцидентите со дронови во Белгија со рускиот замрзнат имот

Германскиот министер за одбрана Борис Писториус денеска сугерираше дека постои поврзаност меѓу неодамнешните инциденти со дронови во Белгија и дискусиите за користење на замрзнатиот руски имот што го чува белгиската финансиска институција Euroclear за финансирање на големиот заем за Украина.

Во последните денови, појавата на дронови над аеродроми и воени бази во Белгија стана чест проблем, а во изминатите месеци предизвика значителни нарушувања низ цела Европа. Некои функционери изјавија дека ваквите инциденти претставуваат „хибридно војување“ од страна на Русија, но Москва негира каква било вмешаност.

– Да, сите го гледаме тоа. И Белгијците исто така. Оваа мерка има за цел да шири несигурност и да внесува страв во Белгија – „Не се осмелувајте да го допирате замрзнатиот имот“. Ова не може поинаку да се протолкува, рече Писториус на прес-конференција во Берлин.

Белгиското Министерство за одбрана одби да ги коментира неговите изјави, но потврди дека „оваа можност веќе се споменувала во Белгија.“

Белгискиот премиер Барт де Вевер изјави дека земјата мора да добие конкретни и сигурни гаранции пред да почне спроведување на планот за користење на замрзнатиот руски имот како помош за Украина во нејзината борба против руската инвазија.

Ставот на Белгија е клучен, бидејќи токму преку Euroclear се чува голем дел од рускиот замрзнат имот.