Се подготвува кривична пријава: Рустеми и неговиот соработник се уште во полициска станица

Осомничените Рустеми и Саити се во полициска станица Газибаба и сè уште трае рокот од 24 часа за полициско задржување додека се подготвува кривичната пријава, информираа за Телма од обвинителствотo.

По пoднесувањето на кривична пријава, официјално се отвара истрага во чии рамки и доколку обвинителството оцени, може да се бараат и мерки за обезбедување на присуство на осомничените.

Директорот на ЈП „Комунална хигиена“ Скопје, Сабахудин Рустеми беше уапсен вчера како и Аки Саити од Сарај, раководител во Кумунална хигиена, за несобирањето на ѓубрето во Скопје.

„Приведени се и задржани две лица од раководството на ЈП „Комунална хигиена“ Скопје, во врска со сомненија за кривично дело од член 230 од Кривичниот законик“, соопштија од Обвинителството.

Овој член во Кривичниот законик е во главата Загрозување на животната средина и природата со отпадни материи.

Член 230 гласи:
(1) Тој што спротивно на прописите за заштита на животната средина и природата складира, остава или расфрла отпадни материи или со нив постапува на начин со кој се менува квалитетот на воздухот, почвата, водата или водотекот, во мера што може да ги влоши условите за жнвот на лугетоили животните или растенијата и да го загрози нивниот опстанок, ќе се казни со затвор од три месеци до три години.
(2) Со казна од став 1 ќе се казни тој што складира, остава или расфрла отпадни материи или со нив постапува на начин со кој се менува квалитетот на воздухот, почвата, водата, водотекот и со тоа ќе предизвика уништување или значително оштетување на шуми, растенија или други насади.
(З) Тој што складира, расфрла или остава опасен отпад што содржи супстанции кои имаат својство на експлозивност, реактивност, запаливост, надразливост, токсичност, инфективност, канцерогеност, мутагеност, тератогеност, екотоксичност или својство на испуштање отровни гасови преку хемиска реакција и биолошко разложување, ќе се казни со затвор од четири до десет години.
(4) Тој што делото од ставовите 1, 2 и 3 ќе го стори од небрежност, ќе се казни со парична казна или затвор до една година.
(5) Ако делото од овој член го стори правно лице, ќе се казни со парична казна.

Истрагата за работата во ЈП „Комунална хигиена“ започна откако во Градот Скопје подолго време не се собираше сметот што доведе и до воведување мерки од страна на здравствените власти.