Лукровски: Хумано решение за безбеден Карпош – прифатилиште за уличните кучиња и општина без страв

Кандидатот за градоначалник на Општина Карпош од редовите на ВМРО-ДПМНЕ, Сотир Лукровски, преку личен став најави конкретен и хуман план за решавање на долгогодишниот проблем со уличните кучиња, со кој, како што вели, граѓаните на Карпош и Скопје живеат во постојан страв и несигурност.

„Многумина избегнуваат вечерни прошетки, родителите се плашат да ги пуштат децата сами надвор, а постарите лица се затвораат во своите домови. Ова не е начин на живот што го заслужуваме. Крајно време е со конкретни мерки да се реши овој проблем, а не како досега – да се игнорира,“ вели Лукровски.

Во својата програма тој најавува перманентно засолниште за уличните кучиња – решение кое, според него, ќе биде хумано, одржливо и етички исправно. „Овој проблем не се решава со игнорирање или со сурови мерки. Јас лично имам две кучиња и не дозволувам нечовечно постапување кон животните. Затоа моето решение е фер – секое куче ќе биде сместено во прифатилиште каде ќе добие храна, нега, ветеринарна грижа и можност за вдомување,“ објаснува Лукровски.

Тој најавува соработка со приватно прифатилиште, како и со странски организации и љубители на животни, особено од северноевропските земји, со цел дел од животните да бидат вдомени во нови семејства.

„Во првите шест месеци ќе ги дислоцираме кучињата и ќе овозможиме граѓаните повторно да се чувствуваат безбедно. Овој четиригодишен проект ќе донесе двоен бенефит – безбедност за луѓето и достоинствен живот за животните,“ додава кандидатот за градоначалник.

Лукровски нагласува дека Карпош мора да биде пример за европска општина со модерен, одговорен и хуман пристап. „Партиципацијата на граѓаните е суштински дел од проектот. Да покажеме дека можеме да живееме во безбеден и нормален Карпош – каде што децата ќе играат без страв, а секое улично кутре ќе има дом,“ порачува тој.

„Овој проект не е само мерка – ова е визија за безбеден и хуман Карпош. Со правилен пристап, транспарентност и грижа, можеме конечно да го решиме проблемот кој повеќе од две децении создава страв и поделби,“ заклучува Лукровски.