Пред целосно гаснење е последната фабрика во Хрватска во која имаше работничко самоуправување

Стопански суд во Вараждин доби предлог за отворање стечај на „Итас Првомајска“ во Иванец, фабрика за машински алати што работеше според моделот на работничко самоуправување. Предлогот го поднесе вработен во таа фабрика поради долг од нешто помалку од 3.500 евра за неисплатени плати.

Во предлогот на работникот Бранко Кишичек, се наведува дека „Итас Првомајска“ не му исплатила нето плати и надоместоци за декември 2025 година, како и за јануари и февруари оваа година, што е основа на неговото барање и причина за стечај бидејќи, како што е наведено, тоа предизвикало неможност на работодавачот да исплати.

Од друга страна, во предлогот се наведува и дека, поради блокирањето на деловната сметка на работодавачот, Агенцијата за осигурување на работнички побарувања (AORT) му исплатила помош во износ на минималната плата за минатиот декември 2025 година од 740 евра, и нешто повеќе од 790 евра за јануари.

Предлогот за отворање стечај следел откако производството во Итас Првомајска било запрено бидејќи Хрватско електро-стопанство им ја исклучила електричната енергија поради долгови. За тој потег објавија синоќа хрватските медиуми.

Проблемите на таа компанија започнале во 2023 година, кога индустрискиот двор и производствената хала биле преземени од агенцијата за наплата на побарувања Х-Абдуко на јавна аукција за 1,4 милиони евра. Според тврдењата од таа компанија, на Итас Првомајска ѝ било овозможено да продолжи со производството до септември 2025 година преку договор за закуп.

По истекот на тој период, според Х-Абдук, Итас Првомајска останала без правна основа и без подмирување на долговите. 

Извршниот директор на „Итас Првомајска“, Драгутин Варга истакна дека компанијата веќе платила 230.000 евра и најави правна битка.
„Нема да престанам. Ќе се јавам во Ускок и сите институции, нека се справи државата со тоа, а не да им ја исклучувам струјата на работниците и да ги оставам без работа. Тоа е срамота“, изјави Варга за РТЛ Данас, пренесе Хина.

„Итас Првомајска“ беше единствената хрватска компанија што произведуваше машински алати од 1960-тите, а воедно и последната со работничко самоуправување. Најголемиот дел од производството се извезуваше во Германија, а компанијата некогаш вработуваше околу 120 работници, а во времето на нејзиното затворање, останаа околу шеесет.