Русија го криминализира негирањето на „геноцидот врз советскиот народ“

Русија го криминализира негирањето на „геноцидот врз советскиот народ“ во Втората светска војна, откако претседателот Владимир Путин потпиша измени на Кривичниот законик, јави ДПА.

Според Кремљ, со измените формално се квалификуваат нацистичките злосторства врз советското население како геноцид, а нивното негирање станува кривично дело.

Терминот „геноцид врз советскиот народ“ сè почесто се користи во Русија во последниве години. Властите, исто така, предложија затворениот музеј посветен на советскиот систем на гулази да биде пренаменет во музеј посветен на жртвите на нацистичките злосторства.

Москва се спротивставува на, како што наведува, обидите да се минимизира страдањето на советските граѓани за време на војната и улогата на Советскиот Сојуз во поразот на нацистичка Германија.

Историчарите и судовите широко се согласуваат дека германската окупација на Советскиот Сојуз од 1941 до 1944 година била проследена со обемни воени злосторства и злосторства против човештвото. Само опсадата на Ленинград – денешен Санкт Петербург – која траела речиси 900 дена, однела околу 1,1 милион животи.

Сепак, во воспоставената историска и правна наука, терминот геноцид најчесто се применува на специфични аспекти од нацистичката политика, особено на систематското истребување на Евреите и на Синтите и Ромите.

Новата руска класификација може да создаде ризици за истражувачите, новинарите и другите кои не се придржуваат до официјалната линија. Предвидени се казни до висина од тригодишен приход или присилна работа до три години.

Законот предвидува и затвор до три години за осквернување на споменици на советските војници и жртвите од тој период, вклучувајќи ги и оние што се наоѓаат во странство

Властите наведуваат дека оваа одредба ќе важи и во Русија и во странство, што потенцијално може да ги опфати и отстранувањата на советски воени споменици и гробишта во други држави, вклучително и Германија.

Во Украина, балтичките земји и делови од Источна Европа, многу вакви споменици беа отстранети во последниве години, каде Црвената армија често се гледа не само како ослободителна, туку и како окупаторска сила.