Мицкоски: Образованието е еден од клучните фактори за развој на државата, инвестираме во него

Образованието е еден од клучните фактори за развој на државата и Владата континуирано инвестира во него преку инфраструктурни проекти вредни повеќе од стотина милиони евра – истакна денеска претседателот на Владата, Христијан Мицкоски, при посетата на отворањето на новата трафостаница „Централна“ во Скопје.

Одговарајќи на новинарско прашање во врска со обвинувањата од лидерот на Социјалдемократскиот сојуз на Македонија, Венко Филипче, дека не се инвестира во образовниот сектор, Мицкоски ги отфрли ваквите тврдења посочувајќи на некои од тековните капитални инвестиции, кои, според него, во времето на претходната власт биле целосно стопирани.

– Па, видете, недалеку од овде се инвестира, да речеме во еден модерен нов студентски дом, кој во времето на претходната влада, беше целосно сопрен, застанат и буквално шајка не беше ставена. Сега сме при крај, не само на тој, туку и на уште еден во Скопје. А уште неколку такви во државата, и студентски и ученички домови, набргу ќе бидат реконструирани. Ќе ве потсетам дека пред неколку дена ставивме камен-темелник на новиот кампус на Универзитетот „Мајка Тереза“. Во тек е анализа на двете незавршени згради на факултетите ФИНКИ и на Факултетот за физичко образование, спорт и здравје, кои се дел од Универзитетот „Св. Кирил и Методиј“. И можам уште да ви набројам многу такви проекти што се мерат со повеќе од стотина милиони евра во периодот во што оваа Влада го направи, за нецели две години, нешто што не беше ни 10 проценти во периодот од седум години на претходната влада – рече Мицкоски.