Министрите за надворешни работи на Г7 бараат заеднички јазик со САД за ставање крај на војната со Иран

Министрите за надворешни работи од Групата 7 (Г7) водечки индустриски демократии денеска се состанаа во Франција, обидувајќи се да изградат заеднички став со САД за тоа како да се стави крај на војната во Иран.

– Колку и да е тешко, со оглед на ситуацијата, ние ќе се вклучиме и мораме да се вклучиме во интензивни дискусии во наредните денови за да изнајдеме заеднички решенија – изјави германскиот министер за надворешни работи, Јохан Вадефул.

Средбата во поранешната опатија во Серне-ла-Вил, во близина на Париз, е прв состанок на министрите за надворешни работи на Г7 откако САД и Израел ја почнаа војната против Иран на 28 февруари. Американскиот државен секретар Марко Рубио треба да пристигне утре.

По првичната размена на мислења за конфликтот на Блискиот Исток со неговите колеги од Британија и Франција, Ивет Купер и Жан-Ноел Баро, Вадефул рече дека мора да се спречи понатамошна дестабилизација, да се зачува економската слобода и да се развијат изгледи како за прекин на борбите, така и за периодот што следува.

Вадефул истакна дека е „добро, важно и правилно“ што Рубио учествува на самитот, додавајќи дека е уверен оти „можеме да дефинираме заедничка позиција“, пренесе ДПА.

– Се разбира, целта е да се прекине овој конфликт што е можно побрзо, но и да се доведе до траен заклучок – рече германскиот министер.

На дневниот ред на дводневниот состанок се очекува да бидат и напорите за реконструкција, вклучително и оштетената заштитна конструкција на нуклеарната централа Чернобил и мерките за борба против трговијата со дрога во Сирија.

Г7 – составена од Франција, Италија, Јапонија, Канада, Германија, САД и Обединетото Кралство – го одржува својот прв формален министерски состанок под француското претседателство во 2026 година. Франција се надева дека разговорите ќе донесат конкретни резултати за големите меѓународни кризи. Претставници од Бразил, Јужна Кореја, Индија и Саудиска Арабија се исто така поканети на индивидуални дискусии.