Епстин – скандал ја тресе владата на Кир Стармер

Лидерката на Британската конзервативна партија, Кеми Бејденок, денеска на прес-конференција ги повика претставниците на Лабуристичката партија да покренат гласање за недоверба на британскиот премиер Кир Стармер поради скандалот поврзан со поранешниот британски амбасадор во Вашингтон, Питер Манделсон.

На прашањето дали конзервативците сакаат предвремени избори и како би се снашла нејзината партија доколку се одржат сега, Бејденок одговори дека конзервативците би ги прифатиле изборите бидејќи знаат дека би завршиле подобра работа, пренесува Скај њуз.

„Но, мора да се осигураме дека јавноста јасно ќе види кои се алтернативите. Ова не е игра. Ние не фрламе коцки. Станува збор за животите на луѓето и јас сум многу загрижена за тоа што се случува во нашата земја“, рече таа.

Бејденок оцени дека „Велика Британија не е управувана“, наведувајќи ги како сериозни проблеми,  покрај скандалот со Манделсон, и планот за откажување од суверенитетот над островите Чагос и законот за потпомогнато умирање.

Според неа, членовите на владата се „расеани поради сопствените амбиции за лидерски позиции“.

Меѓутоа, таа додаде дека не верува дека општите избори ќе се одржат пред 2029 година, кога се редовно закажани, бидејќи „повеќето пратеници од Лабуристичката партија знаат дека нема да се вратат во парламентот“.

„Тие можат да изберат некој друг или да ја принудат владата да се справи подобро, наместо да ги кријат главите во песок. Тоа е она што ги молам да го направат“, нагласи таа.

Либералните демократи, исто така, побараа гласање за доверба на британскиот премиер поради скандалот со Питер Манделсон, по барање на конзервативниот лидер.

„Британскиот народ не може да си дозволи оваа лабуристичка сапуница да се влече со месеци или дури со години, како што беше случајот со Конзервативната партија под Борис Џонсон“, рече лидерот на либералните демократи, Ед Дејви.

Тој рече дека на Велика Британија ѝ е потребна влада која е целосно фокусирана на ставање крај на кризата со трошоците за живот, средување на здравствениот и социјалниот систем и повторно поттикнување на растот на економијата.

Дејви истакна дека гласањето е неопходно за да се извлече земјата од ќор-сокакот.

„Кир Стармер треба да каже: „или докажете или замолчете“. Ајде сега да одржиме гласање за доверба и да видиме дали пратениците од Лабуристичката партија имаат доверба во премиерот, за да може владата, на еден или друг начин, да ја надмине оваа криза и да почне да се справува со промените што ѝ се потребни на нашата земја“, рече тој.

Името на поранешниот британски министер, кој беше отстранет од функцијата британски амбасадор во САД минатата година поради неговите врски со осудениот сексуален престапник Џефри Епстин, во петокот се појави во документите објавени од американското Министерство за правда.Тие покажуваат дека Епстин му платил 75.000 долари на Лорд Манделсон во три одделни трансакции од по 25.000 долари во 2003 и 2004 година.

Фотографии од Манделсон во долна облека беа откриени и во најновата транша од досиејата на Епстин, а редигираната фотографија го прикажува како стои до жена, чие лице не е видливо, за која тој изјавил дека не се сеќава на жената, ниту на местото и околностите во кои е направена фотографијата.

Е-поштата откри дека поранешниот британски амбасадор во Вашингтон и европски комесар за трговија бил во контакт со Епстин откако бил осуден во 2008 година, испраќајќи му низа пораки со поддршка.