МАЕИ бара изземање на општина Пустец од државниот план за отворање центри за мигранти

Единствената македонска партија во Албанија, Македонската алијанса за европска интеграција (МАЕИ) денеска поднесе тужба до Управниот суд во Тирана против Владата на Албанија, поради одлуката за отворање три центри за мигранти на територијата на општина Пустец, општина во која живее македонско национално малцинство.

Со тужбата, која ја достави претседателот на партијата, Васил Стерјовски, се бара „изземање на општина Пустец од државниот план за отворање центри за мигранти, бидејќи одлуката е донесена без консултација со локалната самоуправа, без јавна расправа и без почитување на правата на локалното население“.

МАЕИ оценува дека оваа одлука претставува директно загрозување на интересите, безбедноста и демографската стабилност на македонската заедница во Општина Пустец и е спротивна на Уставот, законите и меѓународните обврски, што Албанија ги има преземено за заштита на националните малцинства.

-Ќе продолжиме со правна и институционална борба сè додека не се заштитат правата и достоинството на македонската заедница, рече за МИА, Стерјовски.

Против изградба на прифатни центри за мигранти претходно остро реагираа МАЕИ, МД „Илинден“-Тирана, а денеска и здружението „ВМРО ДПМНЕ – Албанија“.