Германски претседател во прва државна посета на Британија по повеќе од 25 години

Британскиот крал Чарлс Трети следниот месец ќе биде домаќин на првата државна посета на германски претседател по 27 години.

Претседателот Франк-Валтер Штајнмаер ќе биде свечено пречекан од Чарлс и кралицата Камила во замокот Виндзор од 3 до 5 декември.

Посетата ќе се одржи помалку од два месеца откако Чарлс му беше домаќин на американскиот претседател Доналд Трамп, кој во септември имаше високо профилна посета на историската резиденција во округот Беркшир, пренесе ДПА.

Необично, ова ќе биде третата државна посета на која кралот е домаќин годинава, откако во јули го пречека и францускиот претседател Емануел Макрон.

Чарлс сè уште е под терапија за рак, но не покажува никакво забавување во својот зафатен распоред.

Монархот, кој има 76 години, на крајот на месецов ќе патува и во Италија, во државна посета на Ватикан, каде што ќе се сретне со папата.

Кралот со Камила патуваше во Германија во 2023 година, во првата државна посета по неговото стапување на престолот.

Тогаш доби стоечки аплауз кога одржа прв говор на британски монарх на седница на германскиот Бундестаг (долниот дом на парламентот), при што пред преполната сала изјави дека сака да го „обнови заветот на пријателство меѓу двата народи“.

Штајнмаер, кој присуствуваше на крунисувањето на кралот и кралицата пред две години, ќе биде придружуван од својата сопруга, Елке Буденбендер, која е поранешна судијка.

Други детали за посетата ќе бидат објавени дополнително, но се очекува да вклучуваат свечен пречек, голем државен банкет во салата „Сент Џорџ“ во замокот и разговори со британскиот премиер Кир Стармер.