Трамп примил бустер доза против Ковид и вакцина против грип, Белата куќа уверува дека е во „исклучително здравје“

Американскиот претседател Доналд Трамп примил бустер доза против Ковид-19 и сезонска вакцина против грип за време на посетата на Воено-медицинскиот центар „Волтер Рид“, соопшти Белата куќа.

Според официјалниот медицински извештај што го потпиша неговиот личен лекар, д-р Шон П. Барбарела, претседателот „останува во извонредна физичка состојба, со стабилни срцеви, белодробни и метаболички функции“.

Прегледот бил дел од редовниот годишен здравствен надзор на Трамп и траел неколку часа, при што се направени лабораториски тестови, напредни снимања, ултразвук и анализа со вештачка интелигенција за процена на кардиоваскуларното здравје.

„Резултатите укажуваат дека срцевата возраст на Претседателот е приближно 14 години помлада од неговата хронолошка возраст,“ се наведува во документот.

Според Белата куќа, седумдесет и деветгодишниот Трамп примил две вакцини „во подготовка за претстојните меѓународни активности и патувања“. Тој утре треба да отпатува на Блискиот Исток, каде што ќе се сретне со регионални лидери во рамки на дипломатските напори по прекинот на огнот меѓу Израел и Хамас.

Портпаролката на Белата куќа, Каролин Левит, изјави дека прегледот бил „рутински и планиран“, нагласувајќи дека не станува збор за итен или неочекуван здравствен преглед.

На Трамп во јули му беше дијагностицирана хронична венска инсуфициенција – состојба која не е животозагрозувачка, но предизвикува задржување на крв во нозете и отоци.Иако лекарите наведуваат дека состојбата се контролира со медикаментозна терапија и физичка активност, медицински експерти предупредуваат дека ќе биде потребно постојано следење поради возраста и политичкиот ангажман на претседателот.

Инаку, Американските Центри за контрола и превенција на болести неодамна ги ажурираа препораките за вакцинација против Ковид-19, ограничувајќи ја за лица над 65 години или за хронично болни, освен по консултација со лекар. Белата куќа потврди дека Трамп примил нова формула на вакцината, одобрена за сезоната 2025–2026.