Кремљ вели дека преговорите за Украина во Истанбул се „на чекање“, го обвинува Киев

Русија ги обвини украинските лидери за нарушување на преговорите во Истанбул за евентуално мирно решавање на конфликтот, објави ДПА.

-Процесот е на чекање поради неподготвеноста на режимот во Киев да одговори на кој било начин на прашањата што ги поставивме, изјави портпаролот на Кремљ, Дмитриј Песков, пред новинарот на руската државна телевизија, Павел Зарубин, кој е близок до Кремљ, објави ДПА.

За време на интервјуто, Песков рече дека Украинците не одговориле на рускиот нацрт-предлог за формирање три работни групи.

-Тие не одговараат на нацрт-документ што им беше предаден, тие не одговараат на нашиот предлог за создавање три специфични работни групи. Сето ова е потребно за да се започне со „домашната задача“ што треба да се напише до времето на самитот, рече Песков.

Според портпаролот на Кремљ, руската страна е исполнета со оптимизам што доаѓа од духот на Енкориџ. Песков се осврна на средбата меѓу рускиот претседател Владимир Путин и американскиот претседател Доналд Трамп што се одржа во овој град во американската држава Алјаска на 15 август.

Од оваа средба не произлегоа опипливи резултати во врска со конфликтот во Украина, забележува ДПА.

Според портпаролот на Кремљ, Киев не придонесува позитивно во процесот, но Москва се надева дека Трамп ќе ја задржи својата политичка волја за мирно решение.

Русија ја започна својата војна во Украина на 24 февруари 2022 година. Делегации од Москва и Киев се состануваат постојано од мај оваа година за директни преговори во турската метропола Истанбул.

Договорени се неколку размени на воени заробеници и тела на загинати војници, но Русија одбива да ги повлече своите главни барања, поради што мировен договор не е на повидок во блиска иднина, нагласува ДПА.