Денеска се одбележува Светскиот ден за подигање на свеста за аутизмот

Во светот денеска се одбележува Светскиот ден за подигање на свеста за аутизмот под темата „Аутизмот и човештвото – секој живот има вредност“.

„Во време кога дезинформациите и регресивната реторика за животот на аутистичните лица повторно се појавуваат, овогодишниот виртуелен настан е повик за акција да се надмине ограничувачкиот наратив и да се препознае вроденото достоинство, еднаквите права и безусловната вредност на секое аутистично лице“, соопштија ОН.

Со потврдување дека животите на аутистичните лица се составен дел од нашиот колективен напредок и постигнувањето на Целите за одржлив развој, овогодишното одбележување повикува на иднина каде што различноста се почитува, достоинството е заштитено и секое аутистично лице може да напредува, нагласија ОН.

Откако Генералното собрание на Обединетите нации во 2007 година го прогласи 2 април за Светски ден на свесноста за аутизмот, ОН работеа на промоција на целосното остварување на човековите права и основните слободи за лицата со аутизам, осигурувајќи го нивното рамноправно учество во општеството. Со текот на годините е постигнат значителен напредок, главно благодарение на застапниците за аутизам кои неуморно работат на тоа животните искуства на лицата со аутизам да ги стават во прв план на глобалните дискусии.

Резолуцијата на Генералното собрание од 2007 година ја истакна потребата да се подигне свеста на јавноста за аутизмот. Денес, повеќе од 18 години подоцна, глобалното движење се прошири надвор од свесноста кон активно промовирање на прифаќањето, уважувањето и инклузијата, препознавајќи го придонесот што луѓето со аутизам го даваат во своите заедници и во светот воопшто.