Напаѓачот од Крајстчерч тврди дека ја признал вината во состојба на „ментална неспособност“

Белиот супремацист кој пред седум години уби 51 муслимански верник во две џамии во Нов Зеланд, Брентон Тарант (35), денеска изјави дека бил ирационален кога се изјаснил за виновен.

Тој ова го кажа во жалбениот процес пред новозеландскиот суд преку видео линк и додаде дека тешките затворски услови го влошиле неговото ментално здравје додека го чекал судењето и дека во суштина не бил способен да се изјасни за виновен.

– Немав ментално здравје потребно за донесување одлуки во тоа време. Мислам дека прашањето е дали навистина знаев што сакам да направам или што би била добра идеја? Не, всушност не знаев. Јас донесував одлуки, но тоа не беа доброволни избори и не беа рационално донесени избори поради условите во затворот, рече Тарант.

Тарант, австралиски државјанин, пукаше во две џамии во Крајстчерч во март 2019 година за време на молитва, што се смета за досега најсмртоносното масовно пукање во историјата на Нов Зеланд. Непосредно пред нападот тој објави расистички манифест, а за време на самиот напад користеше полуавтоматско оружје од воен тип и ги пренесуваше убиствата во живо на Фејсбук со помош на камера поставена на главата.

Тарант на почетокот ги негираше сите обвинувања, но една година подоцна се изјасни за виновен по 51 точка од обвинението за убиство, 40 точки од обвинението за обид за убиство и една точка од обвинението за извршување терористички чин. Тој служи доживотна казна затвор без можност за условно пуштање, што е првпат новозеландски суд да изрече казна со која се бара лицето да го помине остатокот од животот во затвор.

Апелациониот суд ќе провери дали Тарант бил способен да носи рационални одлуки кога ја признал вината „поради условите во затворот, за кои рече дека биле мачни и нехумани“. Жалбеното рочиште е закажано за пет дена и се очекува да заврши во петок. Ако апелациониот суд одбие да го одобри барањето за поништување на признанието на вината, на рочиште подоцна во текот на годината ќе се разгледа жалбата на неговата казна. Ако жалбата биде прифатена, случајот ќе биде вратен во Високиот суд за Тарант да се изјасни по обвиненијата.