Макрон: Случајот Епстин е прашање на надлежност на американскиот правосуден систем

Францускиот претседател Емануел Макрон изјави дека аферата околу американскиот сексуален престапник Џефри Епстин е „пред сè прашање на надлежност на Соединетите Американски Држави“ и дека американскиот судски систем мора да си ја врши работата независно.

„Ова е случај што главно ги засега Соединетите Американски Држави. Не сакам да учествувам во јавна дебата за ова прашање“, рече Макрон.

Шефот на државата нагласи дека Епстин имал „многу широка мрежа“, што бара од судските институции да дејствуваат „мирно и независно“. Тој, исто така, предупреди на ширењето на теориите на заговор околу случајот, повикувајќи на „вистинска новинарска работа“.

Изјавата беше дадена откако Министерството за правда на САД објави документи што содржат повеќе од три милиони страници поврзани со случајот. Заменик-генералниот обвинител на САД, Тод Бланш рече дека материјалите не содржат нови елементи што би можеле да доведат до дополнителни гонења.

Сепак, откритијата за мрежата на контакти на Епстин предизвикаа меѓународни реакции. Во Франција, поранешниот министер за култура Жак Ланг поднесе оставка од функцијата претседател на Институтот на арапскиот свет во Париз поради неговите врски со Епстин.

„Тој ја донесе својата одлука со чиста совест“, рече Макрон.