Светските лидери се собраа во Бразил пред климатската конференција COP30

Десетици светски лидери денеска и утре се среќаваат во Белем, Бразил, пред официјалниот почеток на годишната конференција на ОН за климатски промени, со цел да разгледаат итни мерки за спречување на глобалното затоплување.

Меѓу европските лидери присутни се германскиот канцелар Фридрих Мерц, францускиот претседател Емануел Макрон и британскиот премиер Кир Стармер, како и високи претставници од Европската Унија и Обединетите нации.

Бразилските домаќини се надеваат дека Самитот ќе даде поттик на двонеделната конференција позната како COP30, која официјално почнува в понеделник и ќе собере десетици илјади учесници од околу 200 земји.

Претседателот Луис Инасио Лула да Силва, кој конференцијата ја нарече „Климатски COP на вистината“, изјави дека целта е постигнување на „конкретни резултати“.

Но, политичката клима е сложена: во светот доминираат вести за војни и економски кризи, фискалната иднина на многу големи сили е неизвесна, а САД под водство на актуелниот претседател Доналд Трамп продолжуваат со својата политика во корист на фосилните горива.

Белата куќа соопшти дека администрацијата на Трамп нема намера да испрати висока делегација на COP30.

Лидерите денеска ќе го означат почетокот на нов мултимилијарден фонд за заштита на тропските шуми, кои се нарекуваат „зелени бели дробови на планетата“.

Времето истекува – во 2019 година, 140 држави се обврзаа да ја запрат сечата на шумите до 2030 година, но според организацијата за заштита на животната средина WWF, само во 2024 година биле уништени речиси седум милиони хектари примарна шума.

Самитот ќе усвои и заеднички повик за подобра меѓународна координација во управувањето со шумските пожари и ќе ја поддржи иницијативата на Бразил за одржливо гориво, со цел производството и користењето да се зголемат четирикратно до 2035 година. Планирана е и декларација која ќе се осврне на борбата против гладот, сиромаштијата и климатските промени.