Жители на Тетово стравуваат поради појава на ерозија на земјата

Ерозија на земја поради интензивните врнежи од дожд се појави на потегот од православните гробишта кон ридот Балтепе во Тетово, па мештаните алармираат дека може да останат без своите куќи и стравуваат за животите. Во 2018 година поради ерозија се урна и една куќа.

– Живееме со страв, ѕидот падна пред три години, Може да падне ѕидот и ерозијата да уништи пет куќи кои се во опасност. Бараме потпорен ѕид да се направи – изјави Кадри Демири.

Од таму поради случката во 2018 година побарале од Општина Тетово да се направи нов потпорен ѕид.

-Тие дојдоа снимија, рекоа дека ќе направат нов ѕид но, еве колку време помина од тогаш, а од тоа нема ништо. Вчера пак беа, направија увид и само ни велат чекајте, а ние еве чекаме скоро три години. Ние само сакаме да живееме како луѓе, без страв дека утре оваа земја над нас ќе ни падне врз глава – вели Кадри Демири.

Местоположбата на овие куќи е на ридест предел, па затоа мештаните стравуваат и од најмало свлечиште на земјата.

– И јас сум се жалел два пати но, без резултат. И кај мене е ризично за живеење. Куќата е загрозена и може исто така да падне како и кај соседот. Се плашиме дека ова брдо над нас може да ни падне додека спиеме и сите да не затрупа. Најмногу се плашиме кога подолго време врне дожд, тогаш е најопасно – изјави соседот на Кадри, Африм Кагури.

Во маалото има околу 25 куќи, а некои од нив се субстандардно изградени. Ерозија на земја е евидентирана на патот од Тетово до месноста Бањиче.