Десет училишни проекти на Центарот за граѓанскиа иницијатива им донесоа опрема на училишта во Прилеп

Во десет прилепски училишта учениците се подготвија за проекти како да ги подобрат условите во училиштата и да може да донесат училишна опрема.

Десетте училишта беа вклучени во проектот „Јакнење на малцинствата и специфичните групи за промовирање на партиципативната демократија на ниво на заедницата, втора фаза“, кој го спроведе Центарот за граѓанска иницијатива, поддржан од ifa/Zivik, Федерална канцеларија на Сојузна Република Германија. Преку програмата се реализираа проектите кои ги подготвија учениците од училиштата.

Како што објаснуваат од ЦГИ-Прилеп, во август годинава 30 ученици од десетте училишта учествуваа на Младинскиот летен камп за развој на локалните иницијативи. Учениците таму научија како да подготват проекти, ги подготвија, а потоа и ги доставија за оценување. Најдобрите беа избрани за поддршка и за реализација.

Во моментов се релизираат активностите, но стигнува и опремата утврдена како потреба во проектите. Некои од проектите се посветени на уредување на училишната околина со уредување и поставување клупи, училници на отворено, други со опрема за настава, за кабинети по анатомија, хемија и за други училишни предмети, а трети, пак, имаа потреба од набавка на печатачи и ЛЦД-проектори.

Преку програмата учениците научија како да пишуваат проекти, но и како да ги реализираат, а на своите училишта им донесоа и нова опрема.