Законот за заштита од заразни болести вечерва на пленарна седница, власта се откажа од забраната за гости по дома

Измените и дополнувањата на Законот за заштита на населението од заразни болести, доцна попладнево поминаа на собраниската Комисија за здравство. Законот пред пратениците на пленарна седница е предвиден да се донесе по скратена постапка, а седницата е закажана за вечерва во 19:30 часот.

За Законот, што се носи по скратена постапка и чии измени се поврзани со мерките за справување со коронавирусот, пратениците од владејачкото мнозинство поднесоа пет амандмани, а амандмани имаа и Алијанса на Албанците и Алтернатива. Дел од амандманите беа прифатени од предлагачот.

Во првиот амандман, којшто беше прифатен од страна на министерот за здравство Венко Филипче, како времени мерки се предвидуваат носење лична заштита на лицето и тоа: респираторна маска, хируршка маска за еднократна употреба, текстилна маска за повеќекратна употреба, свилена марама или шал, памучна марама или шал, бандана и слично, при излегување надвор од домот односно при движење на јавни места и површини од отворен и затворен тип, на пазари, во јавен превоз и при влез во затворени простори на оператори кои поради нивната природна на дејност претставуваат место на собирање на повеќе лица (државни институции, маркети, продавници, банки, пошти, чекални, здравствени установи и слично.

Исто така како времена мерка се предвидува и задолжително самоизолација при тестирање за корона вирус Ковид 19, забрана за групирање по домови на семејни прослави, слави и други собири во групи во одредени периоди од деноноќието, забрана за групирање на јавен простор (паркови, јавни површини или која била површина на отворено во одредени периоди од деноноќието и други мерки утврдении со закон. Се предвидува овие времени мерки да траат додека постои опасност од ширење на епидемија, а за тоа кои мерки ќе се применат да одлучува Владата.

Амандманот предвидува насловот на Законот за заштита на населението од заразни болести да се смени и да гласи „изолација, здравствен надзор, карантин, превоз, задолжително лекување и времени мерки за спречување на внесување и ширење на заразни болести“. Исто така се предвидува лицата заболени од Ковид 19 задолжително да се лекуваат во јавните здравствени установи, а исклучок да биде по медицински индикации болните да можат да се лекуваат и изолираат и во приватни здравствени установи кои имаат дозвола за вршење на дејноста за интензивна нега и терапија или во домашни услови, до колку за тоа постојат услови.

Приватните здравствени установи за да лекуваат пациенти од Ковид 19 треба да имаат согласност од Министерството за здравство дозвола за вршење на дејноста за интензивна нега и терапија Доколку во ЈЗУ се исполнети капацитетите за лекување на болни од Ковид 19 по претходно дадена сосгланост од Министерството за здравство лекувањето на лицата може да се врши и во приватни здравстени установи кои имаат дозвола за вршење на дејноста за интензивна нега и терапија.

Членовите на Комисијата претпладнево дебатираа и за одбивањето да биде потпишан заемот од Светска банка за болниците за ковид, но и за недостатокот на комуникација меѓу власта и опозицијата за мерките за коронавирусот, влијанието на загадувањето што деновиве се повеќе се зголемува и обвинувањата за негрижа од страна на власта.