Подобрување на работничките права преку создавање бизнис-клима која ќе одговара на создавањето подобар закон за работни односи, беше главната тема на дебатата организирана во Пехчево, како дел од проектот „Граѓанинот е вистинскиот инспектор“, кој здружението „ИНИ“ од Виница во соработка со здружението „Хоуп“ од Македонска Каменица го спроведуваат во општините од Источниот Регион.

Според експертот по трудово право Зоран Биковски, главната констатација од дебата во Пехчево е дека и во оваа општина нема казни за прекршувањето на работничките права.

- За жал, и овде постојат прекршувања на работничките права по кои не се постапува, што само по себе влијае граѓаните да заминуваат далеку од своите домови во потрага по подобар живот. Наместо своето право на работа да го остваруваат дома, тоа го прават во странски земји, далеку од својот дом. Доколку се влијае на зголемување на едукацијата на граѓаните за своите права, но и доколку се има поголем слух за потребите на бизнис-секторот, преку обезбедување пофер бизнис-клима за сите, сметам дека може битно да се влијае оваа состојба да се реши, објаснува Биковски.

Досега, како што додаде, вакви дебати се одржани во најголем дел од општините во Источниот Регион, при што сите забелешки ќе бидат преточени во официјален документ, кој ќе биде доставен до Министерството за труд и социјална политика и до други надлежни институции.

-За да се направи подобар закон за работни односи, сите наши забелешки ќе ги препратиме до надлежните, се со цел да бидат предвидени во законските решенија, со што истовремено ќе овозможиме граѓанинот да биде тој што ќе одлучува за тоа што му е потребно, а бизнис-секторот, ќе може економски да се јакне, додаде Биковски.

Последната работилница со која завршуваат активностите во рамки на проектот „Граѓанинот е вистинскиот инспектор“ ќе се одржи на 22 октомври во Штип.


Администратор
19/10/2019 18:44